Extraspección

Encerrado no ventre da serpe metálica
arrinco electróns coas unllas do alfabeto para poder pensar na salvación.

O solpor entra polas fiestras e acende o po de neon no centro da cidade vexetal,
mentres os altofalantes de escuma quebrada
emanan berros de angustia.

O son do motor move o mundo en todas as direccións,
avanzando cara ningures
nun lenzo de pintura a se derreter.

E eu,
atrapado nun batiscafo no fondo do mar,
busco palabras novas ao outro lado do cristal para poder falar de
ti.